Mark 13

Yesu Kun-kun Nwo Wan-Wan Yi

1She Wo ɓei fwa aduwa nyaknu n wyiyi yi, owo bara ho wa ci Wo ge, “Male, Ho gye anyaknu manayi nɓa mi-miyi lo na kuta yi n safya je nyi.”

2Yesu wa dna ɓe gbe wa cige, “E, shawye hoye nsai bwa. Ko kuta gmanyi, ato ɓei fwa kwo tu ndo shem, akpe agusa.”

3– 4Sa Wo ɓei sase tu n Zaitun pe n na wyei ce n Urushelima, Bitrus, Yakubu, Yohanna n Andarawus yi ɓa ɓe fya-a ɓa nya wo. ʼKni sayi nu n na ɓo deye ɓa zhin aduwa nyakun a? Aɓei ku atuze wu na bye kpa?

5Yesu wa gaɓa amsa kpadalayi Wa cige, “Fye to ye Zaho-Zahoi wa dna fye kwo cem. 6Ntuge aza ɓa ɓe n mwa begye ɓai cige ɓanu zhin Kristi, har ɓai dna aza kwoce mwa.

7“A ɓei sun knu vi-viyi n na bayi mwakpa n jesun, ama ʼsa kmaknayi nu to num.

8“Ntuge akni n na ʼbeyi ɓei sunknu n najeyi, ekni ɓei shan-shan n na bayi gbo-gbo, n miknu yi, Azhin ɓiyi nu nyi kwoi wu ge odo n kwo ɓelo nyi, kwo dulo ya. 9Ama sa na nya deye ɓei zhin, fye ye lura, ntugɓe fye ɓe fi n wahala n mwa. Aɓei lo fyei n na wadayi aba. Ai lu fye n na duwa nyakun, ai ga fye laifi n na gwamna ʼba n na suyi, she fye zhin Ma viyi. Efye sa nu nyi nfye ɓei bwa fya zhin emi eye saida nɓa bye. 10Tila a za wo Nabari Manayi ye n na kni vinya kafin esa Kmaknayj ko ɓe. 11Ama sanu aɓei wan fye alo fyei n na wadayi aba, fye to damu n ɓei n fye ɓa dam, fya bma fyehin. Fye da ɓo n Shekwoyi agna fye ge fye da. Dna sayi mi, efyenu ta daɓom ama Zafun Gyi-gyi-yi nu ɓa daɓo n fyemi.

12“Amajeyi na dnagmayi ɓei knu ɓaje har efi, ada yi knu ɓa ɓi, aɓi yi knu ɓa azakwoyi n nabai a wuɓa. 13Aza ɓei bmifye ntu ge fye zhin Ma nya nu. Ama eza n wa mi gni har esazo sa to wa na Ma ɓom, wo ɓei pwo.

14“Sanu fye ɓei gye Nyanukwoi gni a gni-gni na duwa nyakun Nyabai, kna tnubua – busi, n ho ɓa mi ha lo Yahudiya ʼpe 15– 16La pye! Nho tu n nyakun she nu, to kashi ha lo apyi mim. Nho tu fwa nu, to jezeɓe ntu ha gyiwye ɓo kwo ajem.

17“Aya na nuboda ʼba dna na nyipyei ye mi, n na ɓiya yi mɓa na ɓiyi shi. 18Fye zhin aduwa ntuge efye subui to kwoi ɓe dna n vinyikwo mi m. 19Anyipyei a nukwoyi nu na to shin ɓa pya bwam, tunyi shi Shekwoyi ɓei sanyi. Ai ta je ɓa pya bwam. 20N Shekwoyi nu to ɓei ce anyi-pyei a nukwoyi zunyam, wye-wyei gmanyi to ɓei pwom. Ama ntu Wa za kni-kniyi ɓo, Wo ɓei ce anyi-pyei zinya.

21“Njesun n ʼza gna fye ge, Kristi nu gni nyi, ʼKo kuwa ‘Wonu gni nu,’ fye to ye m. 22Ntuge a Kristi akatanya ɓei knu n na anabi akatanya yi n ɓa ɓei zhin aɓo a wowoyi ɓai dna aza kwoce, n kwa yezhi har n Shekwoyi aɓi yi. 23Fye zhin pecei-ye, Miku pma fye gna!

24“N wahala ye avun, nyipyei ɓei dnawyegma, epya to ɓei ga buzangnam. 25Akpasu ɓei kaya, anyi bmana ɓei shando.

26“Nsayi anyi vinya ɓei gye Mi wye, Kristi, Mi yi ɓe dna iko dnagmayi n latuyi ɓe. 27Nsayi, Miyi tnu amalaika ɓai ye Maza ʼkni-kniyi zhi n nanyi mi vinya.

28“Fye tuɓo mwi gbayi shinwa, sanu kwo ya afintolo ci, fya kpege vinyikwo laga.

29“Sanu fya gye aɓo deye n Ma gnafye nyi ɓai zhin, fye ku kpe ge Emi jezeɓe la wo vivi, Mi gnilo n na boknumi gbe.

30“E, anya nyi n ɓa ɓei wuge sak-maknayi la ga. 31Eshe nkniyi ɓa ɓa diya, ama ema ɓeda ta diyan, har nyalo-nyalo.

32“Dudu lonu, zaho-zahoi, kwo amalaika n ʼshe ko Emihin, Mi ta kpe nyipyei yelom, ko esa n na ɓeye ɓei zhin m, akpe Emi Dada n Wo dna she nyi. 33Shi fye ta kpe nyipyei yelo n na ɓeye ɓei zhin nyim, fye ku zhigwu fyei dna Mi ɓeɓe wye.

34“Fye ɓa mwi Mi ɓeɓe do n zayi nwo ɓei lo knido n kpai. Wa ga owa tnu-tnuyi tnu-tnu ɓa zhin wa kpe zhi. Wa gna owo zokwo guyi ge wo dna wo zhi-zhi wye.

35– 36“Fye lawye ka dai-dai. Ntuge fye ta kpe saye lo Mi ɓei ɓem. Ko dna sukwo, ko n labmi yi, kwo n nyipyei yi. Fye to ye Miye zhi Ma sun fye zhi fyei wan gyem. 37Oɓo nyi Mi gnafye, n ʼzaho-zahoi yi vinya, Fye gwu!”